金庸先生唔單止係香港文化界嘅驕傲，更加有句說話係用嚟形容佢嘅影響力，就係「有華人的地方，就有金庸武俠」。亦都係因為咁，即使金庸先生已經離世幾年，關於佢嘅生平以及著作嘅展覽仍然不時舉行。
近日為咗慶祝香港回歸祖國25周年，特區駐滬辦特別策劃咗一個「金庸展-上海站」嘅展覽，並且日前就已經喺上海圖書館東館開幕。金庸先生（查良鏞博士）正正就係出生於浙江海寧，並曾經喺上海居住工作，所以同上海呢個地方絕對係有濃厚嘅緣份。而今次嘅展覽就係由香港文化博物館以及中央圖書館借出館藏，當中近八成嘅藏品都係首次喺內地展出，希望可以通過呢個機會等內地嘅金庸迷緬懷呢位大俠。
原圖嚟自網絡